Aprelin 23-də beynəlxalq müsabiqələr laureatları, pianoçu Züleyxa Usubova və bəstəkar, skripka ifaçısı Üzeyir Məmmədovun Kamera və orqan musiqi zalında "Kamera musiqisi axşamı" adlı konserti keçirilib.
Buz.Su Trend-ə istinadən xəbər verir ki, konsertdə Azərbaycan və xarici bəstəkarların əsərləri ifa edilib.
Frans Şubertin "Sonata №1 D maj. D 384", Qara Qarayevin violin və fortepiano üçün "Sonata (d moll)" Lüdviq van Bethovenin "Violin Sonata No.5 in F major Op.24 'Spring'" əsərlərləri tamaşaçılar tərəfindən böyük maraqla qarşılanıb.
Pianoçu Züleyxa Usubova respublika və beynəlxalq müsabiqələr laureatıdır. Dəfələrlə simfonik və kamera orkestrləri ilə çıxış edib. Z.Usubova IX və X Beynəlxalq Qəbələ Musiqi Festivalının, I Beynəlxalq Pianoçular Festivalının iştirakçısı olub.
Üzeyir Məmmədov Bakı Musiqi Akademiyasının Bəstəkarlıq ixtisasını bitirsə də, həyatını skripkasız təsəvvür etmir. Bir çox beynəlxalq müsabəqənin laureatı olan Ü.Məmmədov 2021-ci ildə keçirilmiş "Vətən Müharibəsindəki Şanlı Qələbəmizə həsr olunmuş Bəstəkarlıq Müsabiqəsi"ndə böyük simfonik orkestr üçün yazılmış "Qəhramanlıq Dastanı" adlı əsəri ilə iştirak edib və fəxri fərmanla təltif olunub. 2023-cü ildə Azərbaycan Bəstəkarlar İttifaqının təqdimatı ilə Gənclər və İdman Nazirliyi tərəfindən "İlin gənci" mükafatına layiq görülüb.



Anşlaqla keçən konsertin yenidən təşkil edilməsi üçün ifaçılara çoxsaylı müraciətlər olduğundan mayın 17-də həmin məkanda növbəti konsertin keçirilməsi qərarlaşdırılıb. Konsertdə Üzeyir Məmmədovun bəstələdiyi əsərlər səsləndiriləcək.
Buz.Su
​Xəbərlərimizi WhatsApp kanalımızdan da oxuyun

Mənbə: https://news.milli.az/culture/1199255.html